Ağdamda Vətən Müharibəsi şəhidi İsrafil Zülfüqar oğlu İbrahimovun xatirəsinə həsr olunmuş “Əbədi Qəhrəman”adlı filminin təqdimat mərasimi baş tutub

28 oktyabr 2024-cü il tarixdə Ağdam Muğam Mərkəzində Ağdam Rayon İcra Hakimiyyətinin təşkilatçılığı və “Bir Təbəssüm” Vətənpərvərliyin Təbliğinə Yardım İctimai Birliyinin təşəbbüsü ilə Vətən Müharibəsi şəhidi İsrafil Zülfüqar oğlu İbrahimovun xatirəsinə həsr olunmuş “Əbədi Qəhrəman” adlı filmin təqdimat mərasimi baş tutub. Tədbirdə şəhidin ailə üzvləri, Rayon İcra Hakimiyyətinin başçısı Vaqif Həsənov, aparatın əməkdaşları, Milli Məclisin deputatı Bəxtiyar Əliyev, Yeni Azərbaycan Partiyası Ağdam Rayon Təşkilatının sədri Mansur Quliyev, şəhid ailələri, qazilər və rayon ictimaiyyətinin nümayəndələri iştirak etmişlər.

Mərasim Dövlət Himninin səsləndirilməsi ilə başlamış, ölkəmizin ərazi bütövlüyü və suverenliyi uğrunda şəhid olmuş Vətən övladlarının və Ulu öndər Heydər Əliyevin əziz xatirəsi bir dəqiqəlik sükutla yad edilmişdir. Tədbirdə çıxış edən Rayon İcra Hakimiyyətinin başçısı Vaqif Həsənov və digər natiqlər iştirakçıları salamlamış, şəhid İsrafil İbrahimovun keçdiyi şərəfli döyüş yolundan , şəhid ailələrinə, qazilərə göstərilən dövlət qayğısından bəhs etmişdir. Şəhidin ailə üzvləri çıxış edərək filmin ərsəyə gəlməsində əməyi olanlara və tədbirin təşkilatçılarına minnətdarlığını bildirmişlər. Çıxışlardan sonra film tədbir iştirakçılarına nümayiş etdirilmişdir. Qeyd edək ki, Azərbaycan Ordusunun kiçik çavuşu olan İsrafil İbrahimov 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan İkinci Qarabağ müharibəsi zamanı Cəbrayılın, Qubadlının və Laçının azadlığı uğrunda aparılan döyüşlərdə iştirak edib, oktyabrın 26-da Laçın rayonunun Səfiyan kəndi istiqamətində gedən döyüş əməliyyatlarında qəhrəmancasına şəhid olub. İsrafil Zülfüqar oğlu İbrahimov ölümündən sonra Azərbaycan Respublikası Prezidentinin müvafiq sərəncamları ilə 3-cü dərəcəli "Vətənə xidmətə görə" ordeni, "Vətən uğrunda" , "Cəbrayılın azad olunmasına görə", "Qubadlının azad olunmasına görə" və "Laçının azad olunmasına görə" medalları ilə təltif edilmişdir.