Ağdam rayonu Quzanlı qəsəbəsində mərkəzi meydanda ümumrayon bayram şənliyi keçirilib

Baharın gəlişi cəbhə bölgəsi olan Ağdamda böyük sevinc hissi ilə qeyd olunur.
Ağdam rayonu Quzanlı qəsəbəsində mərkəzi meydanda ümumrayon bayram şənliyi keçirilib. Bayramsayağı bəzədilmiş meydanda xonçalar və səmənilər düzülüb, məktəblilərin əl işləri, Novruz adətləri, milli xörəklər, şirniyyatlar, tarix-diyarşünaslıq muzeyinin eksponatları nümayiş etdirilib.
N saylı hərbi hissənin əsgərlərinin də iştirak etdiyi tədbirdə tonqal qalanıb, gənc idmançıların,  nağara ifaçılarının çıxışları, dirədöymə, kimi müxtəlif oyunlar maraqla qarşılanıb.
Dədə Qorqud və Bahar qız meydana daxil olaraq, bayram iştirakçılarına təbriklərini çatdırıblar.
Bayram şənliyində çıxış edən Ağdam rayon icra hakimiyyətinin başçısı Vaqif Həsənov Ağdamlıları baharın gəlişi münasibətilə təbrik edib, onlara cansağlığı, xoşbəxtlik və əmin-amanlıq arzulayıb. Bildirib ki, Novruz xalqımızın mədəniyyətini, milli-mənəvi dəyərlərini özündə əks etdirən, dünyaya tanıtdıran qədım el bayramıdır. Xalqımızın mənəvi dünyasını, milli düşüncə tərzini, azərbaycançılıq məfkurəsini, qədim mifik görüşlərini, folklorunu, milli varlığını Novruz qədər bütün zənginliyi ilə özündə ifadə edən ikinci bir bayram təsəvvür etmək çətindir.
Tədbirdə N saylı hərbi hissənin əsgərlərinin və Ağdam Dövlət Dram Teatrının aktyorlarının ifasında nümayiş etdirdikləri xüsusi proqram  bayram iştirakçılarında xüsusi əhval - ruhiyyə yaradıb.
Rayonun ictimai-siyasi, sosial-iqtisadi və mədəni həyatında fəallıq göstərən şəxslərə  Ağdam rayon İcra Hakimiyyəti başçısı tərəfindən fəxri fərmanlar və bayram sovqatı təqdim olunub. Bayram tədbiri rəngarəng konsert proqramı ilə davam edib.