Baş nazirin müavini: “Ermənilərin atəşi nəticəsində ümumilikdə 450-dən çox məcburi köçkün evi zərər çəkib”
Baş nazirin müavini, Qaçqınların və Məcburi köçkünlərin İşləri üzrə Dövlət Komitəsinin sədri Əli Həsənov Ağdam rayonuna səfər edib
Ağdama gələn komitə sədri, aprel ayının əvvəlində və sonunda erməni hərbi birləşmələrinin yaşayış məntəqələrini ağır artilleriyadan atəşə tutması nəticəsində mərmi düşən evlərə baxıb. Baş nazirin müavini Baharlı məcburi köçkün düşərgəsində ailələrlə görüşüb, məcburi köçkün uşaqların təhsil aldığı məktəblərdə təhsilin keyfiyyəti ilə maraqlanıb.
Ə. Həsənov bildirib ki, erməni hərbi birləşmələri yaşayış məntəqələrini atəşə tutması nəticəsində dağılan evlərin bərpasına start verilib: “Təxminən 450-dən çox məcburi köçkün ailəsinin mənzili zərər çəkib, onların 50-si tamamilə dağılıb. Dağılan evlər əsasən Ağdam və Tərtər rayonları ərazisindədir”.
Baş nazirin müavini onu da deyib ki, son döyüşlərdə ümumi şəhid olan şəxslərin 17 nəfəri məcburi köçkündür.
